|
އަންގާރަ, 23 ފެބްރުއަރީ 2010 23:43 |
|
މީހުން ދިރިއުޅޭ ރަށްރަށުގައި ބަނގުރާ ވިއްކުމުގެ ހުއްދަ ދޭގޮތަށް ނިންމައިފި |
|
 މާޗުމަހުގެ 1 ވަނަ ދުވަހުން ފެށިގެން ރާއްޖޭގެ މީހުން ދިރިއުޅޭ ރަށްރަށުގައި ބަނގުރާ ވިއްކުމުގެ ހުއްދަ ދޭގޮތަށް މިނިސްޓްރީ އޮފް އިކޮނޮމިކް ޑިވެލޮޕްމަންޓް އިން ނިންމަވައި އެކަން އާންމުކޮށް މިއަދު އެމިނިސްޓްރީގެ ވެބްސައިޓްގައި ޝާއިއުކޮށްފިއެވެ. މި ގަވާއިދު ބުނާ ގޮތުން، މީހުން ދިރިއުޅޭ ރަށްރަށުގައި ޓޫރިޒަމް މިނިސްޓްރީން ގަބޫލުކުރާ ފެންވަރަށް ހަދައި އެ މިނިސްޓްރީގައި ރަޖިސްޓްރީކޮށްފައިވާ ހޮޓާތަކުގެ ތެރެއިން މަދުވެގެން 100 އެނދުގެ ހޮޓާތަކުގައި ހިންގާ ބާތަކުގައި ބަނގުރާ ވިއްކޭނެ އެވެ. އަދި ބައިނަލްއަގްވާމީ އެއާޕޯޓުތަކުގެ ޑިޕާޗާ ޓާމިނަލްގައި ޓޫރިޒަމް މިނިސްޓްރީން ގަބޫލުކުރާ ފެންވަރަށް ހަދައި އެ މިނިސްޓްރީގައި ރަޖިސްޓްރީކުރާ ބާ ތަކަށާއި ޓޫރިޒަމް މިނިސްޓްރީގައި ރަޖިސްޓްރީކޮށްފައިވާ ޕިކްނިކް އައިލެންޑްތަކާއި ޔޮޓްމެރީނާތަކުގައި ވެސް ބަނގުރާ ވިއްކުމުގެ ހުއްދަ ދެވޭނެ އެވެ.
އެ މިނިސްޓްރީގެ ވެބްސައިޓުގައި މިއަދު ޝާއިއުކުރި ހަމަ މިޤަވާޢިދު 2009 ނޮވެމްބަރު 9 ވަނަ ދުވަހު އެމިނިސްޓްރީގެ ވެބްސައިޓްގައި ޝާއިއުކުރުމަށްފަހު ވަރަށްގިނަ ބައެއްގެ ފާޑުކިޔުންތަކާއި ހެދި 2009 ނޮވެމްބަރ 14 ވަނަދުވަހު އެޤަވާޢިދު އިސްލާހުކުރަންކަމަށް ބުނެ ވެބްސައިޓުންވެސް ވަނީ ނަގާފައެވެ. އެފަހަރު މިޤަވާއިދަށް ޢަމަލްކުރުމަށް ނިންމަވާފައިވަނީ 2009 ނޮވެމްބަރު 15 ވަނަ ދުވަހުން ފެށިގެންނެވެ.
މީހުން ދިރިއުޅޭ ރަށްރަށުގައި ބަނގުރާ ވިއްކުމާއި ދެކޮޅަށް އިސްލާމިކް އެފެއަރޒް މިނިސްޓްރީންނާއި، އަމިއްލަ ޖަމްޢިއްޔާތަކާއި. ޖަމާއަތްތަކުން އަންނަނީ ވަރަށްބޮޑަށް މިކަމާއި ދެކޮޅުހަދައި އަޑުއުފުލަމުންނެވެ. މިއަދު މިޤަވާޢިދު އާންމުކުރުމާއި ގުޅިގެން އިސްލާމިކް އެފެއަރޒްގެ ސްޓޭޓް މިނިސްޓަރ އައްޝައިޚު މުޙައްމަދު ޝަހީމް ޢަލީ ސަޢީދު ވަރަށްބޮޑަށް ފާޑުވިދާޅުވެފައި ވެއެވެ. އަދި މިނިސްޓްރީގެ ބަހެއް މިކަމުގައި ނުހޯއްދަވައި މިނިސްޓްރީން މިކަމާއިގުޅޭގޮތުން ފޮނުއްވާފައިވާ ސިޓީއަށްވެސް ޖަވާބެއް ނުދެއްވައި، އިކޮނޮމިކް މިނިސްޓްރީން ޤަވާޢިދު އާންމުކުރީތީ ހިތާމަކުރައްވާ ކަމަށް ވިދާޅުވިއެވެ.
މިއަދު އަދާލަތު ޕާޓީންމިކަމާއި ނުރުހުން ފާޅުކުރުމުގެ ގޮތުން ރައީސުލް ޖުމްހޫރިއްޔާއަށް ފޮނުއްވި ސިޓީއަކާއި، މިކަމާއި ދެކޮޅު ހެދުމުގެ ގޮތުން ފަންސާސް އިލްމްވެރިއަކު ސޮއިކޮށްފައިވާ ގަރާރެއްގެ ކޮޕީއެއް ވެސް ވަނީ އާއްމުކޮށްފައެވެ. މިސިޓީގައި އަދާލަތު ޕާޓީން އެދިފައިވަނީ މީހުން ދިރިއުޅޭ ރަށްރަށުގައި ބަނގުރާ ވިއްކުމުގެ ހުއްދަ ބާތިލްކޮށްދެއްވުމަށް އެދިފައެވެ.
މަޢުލޫމާތު ލިބޭގޮތުގައި މާޗުމަހުގެ 1 ވަނަ ދުވަހުން ފެށިގެން ރާއްޖޭގެ މީހުން ދިރިއުޅޭ ރަށްރަށުގައި ބަނގުރާ ވިއްކުން ހުއްދަކުރުމާއި ގުޅިގެން އަންނަ ހުކުރު ދުވަހު އަދާލަތު ޕާޓީން މުޒާހަރާއެއް ބާއްވާގޮތަށްވަނީ ހަމަޖައްސާފައެވެ. އަދި މިމުޒާހާރާގައި މަދަނީ އިއްތިހާދުގެ ފަރާތުންވެސް ބައިވެރިވާ ގޮތަށް ވަނީ ހަމަޖެހިފައެވެ. މިރޭ ޓީވީ އެމްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން މަދަނީ އިއްތިހާދުގެ ފަރާތުން މުޙައްމަދުދީދީ ގޮވާލެއްވީ ރާއްޖޭގެ ހުރިހާ ރައްޔިތުންނަށް އަންހެނުންނާއި ފިރިހެނުން، ދައްތައިންނާއި ކޮއްކޮއިން މިކަމާއި ދެކޮޅަށް ތެދުވަންވެއްޖެ ކަމަށެވެ.
ބަނގުރާ ވިއްކުމުގެ ހުއްދަ ދޭގޮތަށް އިކޮނޮމިކް މިނިސްޓްރީން ނެރުނު ޤަވާއީދު
|
ކިޔުންތެރިންގެ ޚިޔާލް