side add
| ބުރާސްފަތި, 12 ނޮވެމްބަރ 2009 10:44 |
| ޖިހާދަކީކޮބާ؟ |
|
ލިޔުނީ: އިބްރާހީމް ރަޝީދު މޫސާ –  އިސްލާމްދީނުގައި ޖިހާދަކީ ތަފާތު ތަޞްވީރު ތަކެއްގައި ހިމެނޭ ކަމެކެވެ. އޭގެ ތެރޭގައި ނަފްސުގެ ޖިހާދާއި ދީނަށް ގޮވައިލުމުގެ ޖިހާދާއި ދުޝްމަނުންގެ ޢަދާވަތްތެރިކަން ރައްދުކޮށް އެއިން ދިފާޢުވުމަށްޓަކައި ކުރެވޭ ޖިހާދު ހިމެނެއެވެ.ހަނގުރާމައިގެ މައިދާނުގައި ޖިހާދުކުރަން އަންގަވާފައިވަނީ އަމިއްލަ ނަފްސުގެ ދިފާޢުގަ އެވެ. ޤައުމާއި މުޖްތަމަޢުގެ ދިފާޢުގަ އެވެ. ދިފާޢުގެ މަޤްޞަދަކީ ޞުލްޙަ މަސަލަސްކަން ޤާއިމު ކުރުމެވެ. އެހެންކަމުން ޖިހާދަކީ މަޤްޞަދަކަށް ވާޞިލުވުމަށްޓަކައި އޮތް ވަސީލަތެކެވެ. އެއީ އެއްގޮތަކަށް ވެސް ލަނޑުދަނޑިއެއް ނޫނެވެ. ނަފްސުގެ ޖިހާދަކީ ނަފްސު ތަހްޛީބުކޮށް ރިވެތި އަޚްލާޤުގެ ވެރިއަކަށް ހެދުމެވެ. އެންމެ މުހިންމު ޖިހާދަކީ ނަފްސުގެ ޖިހާދެވެ. އެއީ މުޖްތަމަޢުގެ ދޭދޭ ފަރްދުންގެ މެދުގައި އޮންނަ ގުޅުން ރަނގަޅުކޮށްދީ ހަރުދަނާކޮށްދޭ ބާރު ކަމުގައިވާތީއެވެ. ޖިހާދުގެ ތެރޭގައި ޢުދްވާނު ( ނުވަތަ އެގްރެޝަން ) އާ ދެކޮޅަށް ރެސިސްޓްކުރުން ހިމެނެއެވެ. އޭގެ ތެރޭގައި ތިމާގެ ބިމަށް ބަޔަކު އަރައިގަތުމުން އެބަޔަކާ ދެކޮޅަށް ތެދުވާ ތެދުވުން ވެސް ހިމެނެއެވެ. ޖިހާދުކުރަން ޖެހޭނީ ނުވަތަ ދުޝްމަނުންނާ ދެކޮޅަށް ހަނގުރާމަ ކުރަން ޖެހޭނީ ސުލްޙަވެރި ވަސީލަތްތަކުން މަސައްކަތްކޮށް ތިމާގެ ޙައްޤު ނުލިބުމުންނެވެ. އެއީ އެންމެފަހުގެ ޚިޔާރެވެ. ރަސޫލުﷲގެފާނު ހަނގުރާމައަކަށް ލަޝްކަރު ފޮނުއްވާއިރު އެބަޔަކާ ދެކޮޅަށް ހަނގުރާމަ އިޢުލާންކުރުމުގެ ކުރިން އިސްލާމްދީން އެމީހުންނަށް ހުށައެޅުމަށް އެންގެވިއެވެ. އިސްލާމްދީން ޤަބޫލުނުކޮށްފިނަމަ އިސްލާމީ ދައުލަތުގެ އަމާންކަމުގެ ހިޔާވަހިކަމުގެ ދަށުގައި ތިބުމަށް ހުށައެޅެއެވެ. އެމީހުންނާ ދެކޮޅަށް ހަނގުރާމަ ކުރަން އަންގަވަނީ މި ދެކަންތަކުންކުރެ ކަމަކާ ޤަބޫލުނުވެ މުސްލިމުންނާ ހަތުރުވެރި ވުމުންނެވެ. ޝަޚްޞީ ފައިދާއަކަށްޓަކައި ނުވަތަ އެހެންބައެއްގެ ބިމަށް ވެރިވެގަތުމަށްޓަކައި ނުވަތަ އެހެންބައެއްގެ މުދާތަކަށް އަރައިގަތުމަށްޓަކައި ނުވަތަ ބަޔަކު ދީނަށް ގަދަކަމުން ވެއްދުމަށްޓަކައި ހަނގުރާމަކުރުމަކީ އިސްލާމްދީނުގައި އޮތްކަމެއް ނޫނެވެ. މި ޒަމާނުގައި ބައެއްމީހުން ނުވަތަ ބައެއްޖަމާޢަތްތަކުން ދީނުގެ ނަމުގައި ހިންގާ ހަރުކަށި ޢަމަލުތަކަކީ އިސްލާމްދީނުގައި އައިސްފައިވާ ޖިހާދާ އެއްވެސް ގުޅުން ހުރިކަމެއް ނޫނެވެ. އެއީ އެފަދަ ޢަމަލުތަކުގެ ސަބަބުން އިތުރު ލޭ ތަކެއް އޮހޮރިގެންދާތީއެވެ. ކުށެއް ނެތް މަޢުޞޫމު އެތައްބަޔަކު މަރުވެގެން ނުވަތަ ޒަޚަމުވެގެންދާތީއެވެ. މި ޒަމާނުގައި މިފެންނަ ޓެރަރިޒަމުގެ ޢަމަލުތަކާ އިސްލާމްދީނުގައި އައިސްފައިވާ ޖިހާދާ އެއްވެސް ގުޅުމެއް ނެތެވެ. އެހެނީ ޓެރަރިޒަމަކީ ކުށެއްނެތް ބަޔެއްގެ ފުރާނަތައް ދުއްވައިލުމަށްޓަކައި ރާވައިގެން ހިންގޭ ޤާނޫނާ ޚިލާފު ހަރުކަށި ޢަމަލުތަކެވެ. މުސްލިމުންގެ މެދުގައި އުފެދޭ ސިޔާސީ ނުވަތަ މަޛްހަބީ ދެބަސްވުންތައް ޙައްލުކުރަން ޖެހޭނީ ސުލްޙަވެރި މަދަނީ ވަސީލަތް ތަކުންނެވެ. ހަޅުތާލުކުރުމާއި ޞުލްޙަވެރި ހިނގައިލުންތައް ބޭއްވުން ފަދަ ޤާނޫނު ހުއްދަކުރާ ގިޔުގަނޑުގެ ތެރޭގައެވެ. އަނިޔާވެރިކަން ބަދަލުކުރުމަށްޓަކައި އަދި މުންކަރާތްތައް ނަހީކުރުމަށްޓަކައި ބާރުގެ ބޭނުންކުރުމުން ބޭނުންވާ ނަތީޖާއެއް ނުނުކުންނާނެއެވެ. އިސްލާމްދީނުގެ ފިޤްހީ ޤަވާޢިދުތައް ބުނާގޮތުގައި މުންކަރެއް މަނާކުރަން ޖެހޭނީ އެއަށްވުރެ ނުބައި މުންކަރަކަށް މަގުފަހި ނުވާނަމައެވެ. ޖިހާދަކީ ވަރަށް ރީތި ބަހެކެވެ. މިބަހުގެ ބޭނުން ބައެއް ފަހަރަށް ނުރަނގަޅު ގޮތުގައި ބޭނުންކުރެވެއެވެ. ޖިހާދުގެ މާނަތަކުގެ ތެރޭގައި ޙައްޤު ދިފާޢުކުރުމާއި ދީނަށް ގޮވައިލުން ހިމެނެއެވެ. ކޮންމެ ޖިހާދަކީ ހަނގުރާމައެއް ނޫނެވެ. އަދި ކޮންމެ ހަނގުރާމައަކީ ޖިހާދެއްވެސް ނޫނެވެ. އިބްނު ތައިމިއްޔާ ވިދާޅުވާ ގޮތުގައި އިސްލާމީ ހަނގުރާމަތަކަކީ ދިފާޢީ ހަނގުރާމަ ތަކެކެވެ. އޭނާ ވިދާޅުވާގޮތުގައި މުސްލިމުންނާ ޣައިރު މުސްލިމުންނާ ދެމެދުގައި އޮންނަންޖެހޭ ގުޅުމުގެ އަޞްލަކީ ސުލްޙަވެރިކަމެވެ. ވީމާ މުސްލިމުން ޣައިރުމުސްލިމުންނަށް ދީނުގެ ނަމުގައި ޢަދާވަތްތެރިވުމަކީ ދީން ހުއްދަކުރާކަމެއް ނޫނެވެ. ދުޝްމަނުންނާ ދެކޮޅަށް ޖިހާދުކުރުން އިޢުލާނު ކުރުމުގެ ބާރު ދީނުގައި ލިބިފައިވަނީ ޙާކިމަށެވެ. ޖިހާދު އިޢުލާނުކުރުމުގެ ބާރު އެއްވެސް ފަރްދަކަށް ނުވަތަ ޖަމާޢަތަކަށް ލިބިގެނެއް ނުވެއެވެ. އެމީހުންނަށް ޖިހާދަށް ނުކުންނަން ޖެހެނީ ސިފައިންނަށް ކަމަށް ވާތީއެވެ. އިސްލާމްދީނުގައި ޖިހާދަކީ ހަމައެކަނި ޣައިރު މުސްލިމުންނާ ދެކޮޅަށް ކުރެވޭކަމެއް ނޫނެވެ. މީގެ އިތުރަށް ތިމާގެ އަނބިދަރިންނަށް ކާން ބޯން ދިނުމަށްޓަކައި މަސައްކަތް ކުރުމަކީވެސް ޖިހާދެކެވެ. ތިމާ ރިޒްޤު ހޯދުމަށްޓަކައި ތިމާގެ ގެއިން ނުކުތީއްސުރެ އެނބުރި ގެއަށް އަންނަންދެން އޭނާއަކީ ﷲގެ މަގުގައި ހުރި މީހެކެވެ. އެބަހީ އޭނާއަކީ ޖިހާދު ކުރާ މީހެކެވެ. އިސްލާމްދީނުގައި ޖިހާދު ހުއްދަކުރައްވާ ސަބަބުތަކުގެ ތެރޭގައި ނިކަމެތީން ސަލާމަތްކުރުން ހިމެނެއެވެ. މި ޖިހާދު ވާން ޖެހޭނީ ޢުދްވާނަށްދެވޭ ރައްދަކަށެވެ. ޙައްދުފަހަނަޅާ ގޮސްގެން ނުވާނެއެވެ. ބާރުގެ ބޭނުންކުރުމުގައި ޙައްދުފަހަނަޅާ ގޮސްގެން ނުވާނެއެވެ. އެއީ ސާފު ހަނގުރާމައެކެވެ. އެއް ކޮމާންޑަރެއްގެ އަމުރުވެރިކަމުގެ ދަށުން ކުރެވޭ ހަނގުރާމައެކެވެ. އެއީ ލޭ އޮހޮރުވުމުގެ ކުޅިގަނޑެއް ނޫނެވެ. އެއީ ޟަރޫރަތްތެރިކަމުގެ ހަނގުރާމައެކެވެ. މާތްﷲ ހަނގުރާމައިގައި ނަޞްރުދެއްވަނީ ޝަރްޠުތަކެއްގެ މަތިންނެވެ. މީގެ ތެރޭގައި ހިމެނޭ މުހިންމު ކަންތައްތަކަކީ: * ޢަޤީދާގެ ހަރުދަާކަން:� މައްކާގައި މުސްލިމުން ހޭދަކުރި 13 ވަރަކަށް އަހަރަކީ މިކަމަށް ދެވުނު ތަމްރީނެކެވެ. އަދި ތަރްބިޔަތެއް ވެސްމެއެވެ. * މަޤްޞަދު ސާފުވުން ވެރިމީހާއަށް ފުރިހަމައަށް ކިޔަމަންވުން (މުސްލިމުންގެ ޢަދަދު މަދުކަމާއެކުވެސް ބަދްރު ހަނގުރާމައިގައި ނަޞްރު ލިބިފައި، އުޙްދު ހަނގުރާމައިގައި ނާކާމިޔާބު ލިބުނީ ކީއްވެގެންތޯއެވެ. އުޙްދު ހަނގުރާމައިގައި ރަސޫލާގެ އަމުރުފުޅާ ޚިލާފުވުމުގެ ސަބަބުންނެވެ. * އެއްބައިވަންތަކަން * ރަނގަޅަށް ތައްޔާރުވުން * މަޝްވަރާކުރުން އިންސާނާ އޭނާގެ ދުޝްމަނުންނާ ދެކޮޅަށް ހަނގުރާމަކުރަނީ ނުވަތަ ޖިހާދުކުރަނީ އޭނާގެ މިނިވަންކަމަށްޓަކައެވެ. މިނިވަންކަމަކީ އިސްލާމްދީނުގައި އޭނާއަށް ލިބިދީފައިވާ އަސާސީ ޙައްޤެކެވެ. ޝަހާދަތުގެ ދެކަލިމަ ޤަބޫލުކުރާ ވަގުތުން ފަށައިގެން އޭނާއަކީ މިނިވަނެކެވެ. އިސްލާމްދީނުގައި މިނިވަންކަމަކީ އެހެން މީހުންނަށް އިޙްތިރާމުކުރުމާއި އެހެންމީހުންގެ އަމިއްލަ ކަންތައްތަކާ ނުބެހުން، އޭގައި ހިމެނޭކަމެކެވެ. މިނިވަންކަމަކީ ޤައުމުތަކުގެ ރައްޔިތުންގެ އެންމެބޮޑު މަސްއަލައެވެ. ދައުލަތުގެ އެންމެ އިސްވާޖިބަކީ ޤައުމުގެ މިނިވަންކަން ރައްކައުތެރިކުރުމެވެ. އެކަން ޙިޔާމަތްކުރުމެވެ. ފިލޯސަފަރުން ވިދާޅުވާ ގޮތުގައި މިނިވަންކަމަކީ ފިޠުރީކަމެކެވެ. ނަމަވެސް މިނިވަންކަމަކީ މުޠްލަޤު އެއްޗެއްނޫނެވެ. އެއީ ކޮންޓްރޯލް ކުރަންޖެހޭނެ އެއްޗެކެވެ. މިނިވަންކަން ކޮންޓްރޯލް ކުރަންޖެހެނީ އެހެންމީހުންގެ މިނިވަންކަން ޙިމާޔަތް ކުރުމަށްޓަކައެވެ. ނިމުނީ |
ކިޔުންތެރިންގެ ޚިޔާލް